"درس الحياة"

مهما شكوا نار الغرام المجاريح
أنا شعوري غير لو ما فصحته؟
طبعي كذا والجرح ما عاشه مريح
لكن عزاي أن حزنهم مـا فرحته
وكثر العتب لو مجّدوه النواصيح
عن ذاكرة بيض المشاعر مسحته
المسألة ما هي قصيد وتصاريح
ولا قرارٍ بالكلام اقترحته
أنا جوابي فيه للحق توضيح
ولأجل السؤال اللي ببالك طرحته
يا من عتابك فيه نظرة.. وتلميح
قلب الوفاء مهما قسا ما جرحته
ودرس الحياة بكل حزن .. وتفاريح
أن ما تعلمت الخطأ ما نجحته
عندي يقين فيه للبس؟ تصحيح
طــوّعت فيه المستحيل وربحته
من فضل ربي وآمر السحب والريح
عـليّ باب المدعي ما فتحته
وعن طيبة وجيه الـزمان المفاليح
ألغيت مفهوم الملام وشطحته
والصبر في صمته دواء للتباريح
منه تعلمت الكثير ومنحته
قلبٍ مشاعره الصريحة مصابيح
شموخها فوق الشموخ امتدحته
العذر ما له في ثراها صحاصيح
والعز فيها من وفاها فسحته
ولا كل طيرٍ يلتفت للملاويح
ولا كل برق يهزني لو لمحته
عيني على القمة بروس إللواليح
لو دونها بحر المخاطر سبحته
أسعى لها والله عليه التساميح
واللي يدور بخاطري ما شرحته
إلا على اللي في يديه المفاتيح
ربي ولا غيره له السر بحته
وفي كل حال لسر الأسرار ما بيح
وبالحق من جاء لي على الدرب زحته